Aqmescit SİZO-sında tutulğan ve Rusiye quvetçileri tarafından "terror eylemini yapmaqnen" qabaatlanğan qırımlı ressam ve faal Bogdan Ziza Ukrayina prezidenti Volodımır Zelenskıyge mektüp yazdı.
Qırımlı ressamnıñ destegine uquq qoruyıcı leyhanıñ instagram saifesinde haber etilgeni kibi, Bogdan Ziza öz mektübinde Ukrayina prezidentini onı ve Qırım ve Rusiyede tutulğan diger ukrayin siyasiy mabsleriniñ deñişüv cedvellerine kirsetmege çağırdı.
Evel Bogdan Ziza Rostov-na-Donuğa etap etilecegi aqqında haber etilgen edi.
Mayıs ayında Kezlevli Bogdan Ziza Kezlev memuriyetiniñ binasınıñ fasadında mavı ve sarı boya ve yanıcı qarışmanıñ izleri aşkâr etilgen zaman Rusiye quvetçileri tarafından yaqalandı. Ertesi künü Qırım televizionı kezlevliniñ qırımlılar ögünde "tevbesini" kösterdi. Bu kibi videolar Rusiyeniñ Ukrayinağa qarşı büyük istilâsı başlanğandan berli Rusiye tarafdarı telegram kanalları ve haber vastalarında cenkke qarşı narazılıqlarğa açıq takbih kibi sıq-sıq rastkelinir. Bogdan Zizanıñ yaqınları onıñ üzerinde bedeniy küç qullanğanına dair alemetlerni körip, onıñ iskencege ögratılması ihtimalınıñ olğanını bildirdiler. Tutulğan soñ Bogdan Zizanı başta "Rusiye silâlı quvetlerini itibardan tüşürgeni" içün para cezasına mahküm ettiler, soñra tevqif ettiler. O vaqıttan berli o SİZO-da buluna. Bogdan Rusiye Ceza qanunnamesiniñ üç maddesine binaen qabaatlana. Qabaatlavlar arasında terrorcılıq da bar, bunıñ içün o 15 yıl apis cezasına mahküm etile bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
