Yılnıñ başından işğal etilgen Qırımda eñ çoq yanğın Aqmescit rayonında, Keriç ve Aqmescitte oldı. Bu aqta Rusiye kontrolindeki Qırım Fevqulâde vaziyetler nazirliginiñ matbuat hızmeti bildirdi.
«Eñ çoq yanğın Aqmescit rayonında (215 yanğın), Keriç (195 yanğın), Aqmescit (125 yanğın), Kefe (119 yanğın) şeerlerinde ve Bağçasaray rayonında (129 yanğın) qayd etildi», – dep aytıla haberde.
Qayd etilgenine köre, 2172 yanğından 1417-si (65%-ı) açıq alanda oldı.
«Açıq alanda yanğın sayısınıñ artması 5% (2019 senesi – 1351) oldı. 960 yanğın quru ot ve qamış yanmasınen bağlı (keçken sene 852 edi, 12,7%-ğa arttı)», – dep qayd ete müessise.
Hatırlatamız, iyülniñ 21-ne qadar Qırımnıñ ğarbiy, merkeziy, cenübiy, şarqiy rayonlarında ve dağlarında fevqulâde yanğın telükesi beklenile.
