Abdulmecit dört afta hastahanede bulundı. Advokatnıñ aytqanına köre, alı yahşı, ekim ve şaraitlerni şikâyet etmedi. Kurbedinov qayd etkenine köre, palatada ne ayaqyol, ne suv bar. Mabüsler konvoy çağırıp, ayaqyolğa qadar beraber ketmege mecbur. Bu vaqıt devamında Abdulmecit Seytumerov hastahanede edi, yata edi, bir-qaç kere ekimlernen alı aqqında laf etti. İlâc almadı.
«Qanunğa köre, bu davalarda böyle ekspertizalar mecburiy degil. Amma FSB konveyer yapıp, bir qaç yıldan berli bunı yapa, siyasiy mabüslerni psihiatrik hastahanelerden «keçire». Başta FSBniñ maqsadı başqa edi, belki, [mabüslerni psihiatrik müessiselerde ziyaret etmege ne kerek], amma aq qorçalaycılar, kütleviy haber vastaları, siyasiy mabüslerniñ cevabı onı belli bir vaqıtqa qaldırdı. Mahsus hızmetler repressiv maşinanı işletmeycek dep aytmağa mümkün degil, amma şimdilik hastahane formal bir şey. Tahqiqatçılardan böyle sebep eşitesiñ: «O, [siyasiy mabüs mahkemede] añlamay dep kösterse», – dep qayd etti advokat.
«Qırım platforması» sammiti keçirilgen soñ ertesi künü, avgustnıñ 24-nde, Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi. Erkekler tutuldı.
O künü Rusiye kontrolindeki Aqmescitniñ Kiyev rayon mahkemesi Ruslan Asanov, Amethan Umerov ve Remzi Nimetulayevni eki ayğa SİZOda qaldırdı. Tutulğanlar Rusiye Ceza kodeksiniñ 205.5 maddesiniñ birinci qısmına istinaden şübheli sayıldı – terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv. Laf Rusiyede yasaqlanğan Hizb ut-Tahrir teşkilâtı aqqında kete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
