Ukraina Yuqarı Radasınıñ İnsan aqları vekâletlisi Lüdmila Denisova Bağçasaraydaki ekinci «Hizb ut-Tahrir davasınıñ» mabüsi Server Mustafayevniñ muracaatını derc etti. Anda qırımlı aqları bozulğanını, Rusiye tahqiqat izolâtorında kerek olğan şaraitler olmağanını ve davanıñ diger mabüslerine tibbiy yardım kösterilmegenini şikâyet ete. Şikâyetler arasında kelişmegen aş da bar.
«O, oturışuvlar sıq-sıq olğanı içün mahkeme esnasına kerekli azırlıq ve imaye aqqından muntazam sürette marum etilgenini bildire. Server Mustafayev «Rostov vilâyetindeki Rusiye Cezalarnı yerine ketirüv federal hızmeti idaresiniñ SİZO 1 müessisesinde» kerek olğan tutuv şaraitleri olmağanını, hususan tibbiy yardım kösterilmegenini, yollanmalıq aluvda sıñırlarnı, duş aluv, taze avada kezmek imkânından marum etilgenini şikâyet ete», – dep aytıla haberde.
Ukraina ombudsmeniniñ malümatına köre, Mustafayev aşatuv kerek olğanı kibi olmağanını şikâyet ete.
Onıñ aytqanına köre, Ukraina vatandaşları tahqiqat izolâtorından mahkemege alıp ketirilgende olarğa kerekli keyfiyeti olmağan azıq mahsulatı berile ve olar aç qalmağa mecbur ola.
«Muracaatında qayd etkenine köre, mahkeme, oturışuv vaqtında Ukraina vatandaşları Server Zekiryayev ve Timur İbragimovnıñ sağlıq vaziyeti fenalaşqanı içün olarğa tibbiy yardım kösterüv muracaatlarına qulaq asmay», – dep qayd ete Denisova.
Onıñ bildirgenine köre, o, Rusiye insan aqları vekâletlisi Tatyana Moskalkovağa muracaat etip, qırımlılarnı tutuv şaraitlerini halqara standartlarğa uyğun bir şekilge ketirmesini ve Server Zekiryayev ve Timur İbragimovnıñ tibbiy tedqiqlerini yaptırmasını rica etti.
Denisova, insan aqlarınıñ bozuluvına yol berilmesin dep, halqara teşkilâtlar ve diplomatik korpusınıñ vekillerini oturışuvlarğa kelmesine çağırdı.
Fevralniñ 25-nde Bağçasaraydaki «Hizb ut-Tahrir davasınıñ» mabüslerine daa keçken mahkemede qullanuv müddeti bitken aş berildi.
Daa evel advokat Ayder Azamatov, Bağçasaraydaki ekinci «Hizb ut-Tahrir davası» boyunca tizilgen mahkeme oturışuvları cedveli dava mabüsleriniñ imaye aqqını bozıp, olarğa mahkeme oturışuvlarına azırlanmağa imkân bermey, dep bildirdi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqmağa başladı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
