Advokat Siyar Paniçniñ bildirgenine köre, müvekkili, Aluştadaki «Hizb ut-Tahrir davasınıñ» mabüsi Ruslan Mesutovnıñ sağlıq vaziyeti fenalaştı, Rusiye tahqiqat izolâtorında oña tibbiy yardım kösterilmey. İmayeci, Rostov vilâyetindeki Rusiye Cezalarnı yerine ketirüv federal hızmetiniñ idaresine şikâyet berdi, dep qayd etti, dep haber ete «Qırım birdemligi».
«2020 senesi sentâbrniñ 28-nde diger müvekkilerimden alğan malümatqa köre, Mesutov Ruslan Ametoviçniñ sağlıq vaziyeti ayaq pertigi sebebinden fenalaştı. Bugünki künde Rostov-na-Dogu şeeriniñ №1 SİZOsında tutula. Bunıñnen bağlı şikâyet yolladım, hronik sırt hastalıqları bar, areket etip olamay, er kün kezmege çıqıp olamay. Onıñ tibbiy yardım köstermek talaplarına SİZO memuriyeti cevap bermedi. Şimdilik şikâyetime cevap berilmedi», – dep izaatlay advokat.
Rostov vilâyetindeki Rusiye Cezalarnı yerine ketirüv federal hızmetiniñ idare saytında bu malümat yoq.
Rusiye quvetçileri qırımlılarnı 2019 senesi iyünniñ 10-nda keçirgen tintüvlerden soñ tuttı. Rusiye FSBsi, tahqiqat tedbirleri 205.5 maddesine istinaden (terror teşkilâtınıñ faaliyetini teşkil etüv ya da iştirak etüv) çerçivesinde keçirile ve «Hizb ut-Tahrir» teşkilâtınen bağlı. «Qırım birdemligi» birleşmesi bildirgenine köre, Ruslan Nagayev ve Eldar Kantimirov Aluştada, Ruslan Mesutov Büyük Lambatta (Malıy Mayak), «Aluşta» yerli din cemiyetiniñ yolbaşçısı Lenur Halilov Körbek (İzobilnoye) köyünde tutuldı.
Dava mabüsleri al-azırda Rostov-na-Donu şeeriniñ №1 tahqiqat izolâtorında buluna, cinaiy dava ise mahkeme tahqiqatında qala.
«Memorial» Aluştadaki «Hizb ut-Tahrir davasınıñ» dört mabüsini siyasiy mabüs dep tanıdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
