Qırımda Rusiye FSBsiniñ idaresi tarafından patlayıcı maddelerni yapqanında ve saqlağanında qabaatlanğan qırımlı aq qorçalayıcı Yunus Maşaripov Qırımnıñ prokuror muavini Vladimir Kuznetsov adına ariza berip, onı eziyetlegen mahsus hızmet hadimlerine qarşı dava ne içün açılmağanını añlatmasını talap etti.
Bu aqta Maşaripovnıñ arizasında aytıla, onıñ kopiyası Qırım.Aqiqatnıñ muarririyetinde de bar.
«Yalta, Qırım Cumhuriyetiniñ prokuraturası, Qara deñiz arbiy prokuraturası ve şahsen siz, Qırım prokurorınıñ muavini, gestapo işkence usullarını qullanğan ve diger cinayetlerni yapqan Qırımdaki FSB idaresiniñ hadimlerine ve vekâletli şahıslarğa qarşı cinaiy işni ne içün alâ daa açmağanıñıznı yazma şekilde bildirmeñizni rica etem», – dep yaza Maşaripov.
Qırımlı aq qorçalayıcı yazğan arizasında onı eziyetlegen Rusiye uquq qoruyıcı organları hadimleriniñ adlarını yaza, o, olarnı tanıdı.
«Bergen bir sıra arizama baqmadan, rus zabitleri – üyken leytenant Krivko L.S., kapitan Dolgaçev V.YE., ve olarnıñ işdeşleri (umumen 12-15 kişi) – yapqan qanunsız areketleri Qırım Cumhuriyetiniñ prokuraturası tarafından alâ daa tahqi etilmedi», – dep qayd ete Maşaripov.
İşğal etilgen Qırımnıñ müessiseleri bu malümatqa daa cevap bermedi.
Hatırlatam, yanvarniñ 16-nda Rusiye kontrolindeki Yalta şeer mahkemesiniñ oturışuvında Yunus Maşaripov işkencege oğratılğanını bildirdi.
Maşaripov 2017 senesi sentâbr ayında tutulıp apiske alındı. Aq qorçalayıcılarnıñ aytqanına köre, Rusiye FSBsiniñ hadimleri onı kötekledi ve aqımnen eziyetlediler, şunıñ içün özüne iftira atmağa mecbur edi. O, 2014 senesinden berli «bala ve pensiyalılarnıñ aqları bozulğanını teşkilâtlarğa bildirip», aq qorçalayıcı faaliyetinen oğraşqan edi.
«Krım 24» akimiyetke qoltutqan Qırım telekanalı FSBniñ aq qorçalayıcını çekken sorğu videosını derc etti. Sorğu vaqtında Maşaripov, «Yaltada içtimaiy-siyasiy vaziyetke dair malümat toplağanını, turistik mevsimni bozmaq içün plâjlarda ine atqanını, ormannı ateşke bergenini ve Rusiyege qarşı risalelerni tarqatqanını» tarif etti. Videoda aytılğanı kibi, Maşaripov bunı «Qırımtatar Milliy Meclisiniñ teşebbüsinen yaptı, onı ise Ukraina telükesizlik hızmetiniñ hadimleri idare etti».
Meclis reisi Refat Çubarov Qırım.Aqiqatqa bu malümatnı red etti.
Rusiye kontrolindeki Yalta şeer mahkemesi Maşaripovnı patlayıcı maddelerni yapqanında ve saqlağanında qabaatlap, 4 yıl koloniyada qalmasına ve 110 000 para cezası (tahminen 41 biñ ğrıvnâ) tölemesine üküm etti.
Qırımnıñ Rusiye Yuqarı mahkemesiniñ Temyiz instantsiyası Maşaripovnıñ şikâyet arizasını qabul etti.
«Memorial» aq qorçalayıcı merkezi Yunus Maşaripovnı siyasiy mabüs olaraq tanıdı.
