Qırım.Aqiqat müellifi, qırımlı jurnalist Mıkola Semena fevralniñ 19-nda Kyivge kelip, «işini pek sağındı», dep ayttı.
«50 yıl zenaatınen oğraşqan soñ onı senden bir kereden alğanlarında pek ağır, alışmağan duyğularıñ ola. Alacaq ve muarririyetke berilecek malümatnı köresiñ, amma bunı yapıp olamaysıñ. Kimseniñ böyle bir şey körmesini, zenaatdaşlarımdan iç birisiniñ böyle duyğularnı yaşamasını istemeyim», – dep ayttı Semena Qırım.Aqiqatqa.
İşğal etilgen Qırımda Rusiye akimiyeti tarafından mahküm etilgen Qırım.Aqiqat müellifi, qırımlı jurnalist Mıkola Semena fevralniñ 19-nda saba Kyivge Herson vilâyetiniñ Novooleksiyıvka treninen kelip çıqtı. Semenanı Kyiv vokzalında Ukraina telekanallarınıñ çekim taqımları, Qırım.Aqiqat, Azatlıq Radiosı işdeşleri, aq qorçalayıcılar, Qırımdan köçip kelgen insanlar, Ukraina PEN merkezi, Ukraina jurnalistleri milliy birligi ve Ukraina ombdusmeni ofisiniñ vekilleri qarşıladı.
Semenanıñ bildirgenine köre, Kyiv hastahanelerinden birine teşkerüvge ketmege planlaştıra.
Fevralniñ 18-nde Mıkola Semena Rusiye işğal etken Qırımdan esas Ukrainağa tedaviylevge yol aldı. O, Kyivde tibbiy teşkerüvden keçmek, soñra jurnalist faaliyetine devam etmek niyeti aqqında tarif etti.
Semena, «pek yahşı teşkerilse de», Qırım ve Herson vilâyetiniñ memuriy sıñırında Rusiye sıñırcılarınıñ kontrolinden maniasız keçti, dep bildirdi. Esas Ukraina tarafında onı yerli akimiyet vekilleri ve eski siyasiy mabüs Edem Bekirov ve Geniçesk rayon devlet memuriyetiniñ yolbaşçı muavini olğan ömür arqadaşı Gülnara Bekirova qarşıladılar.
RFE/RL prezidenti Jamie Fly Semenanıñ esas Ukrainağa kelişini tebrikledi.
Soñki yılları 69 yaşında jurnalistniñ sağlıq problemleri başlandı. Mahkeme esnasında yürek ve omurğa problemleri ortağa çıqtı. Qırımda kerekli tedaviylev körip olaamdı, çünki anda bu alanda ihtisaslı mütehassıslar yoq. Kyiv neyrohirurgiya institutınıñ mütehassısları onı tedaviylemege razı oldı, amma Rusiye tahqiqatçıları Mıkola Semenağa anda tedaviylenmesine izin bermedi. Moskva hastahaneleriniñ tekliflerine jurnalist razı olmadı.
2018 senesiniñ soñunda Aqmescitte öt quvuğı kesip alındı ve zafra yollarından taşlar çıqarıldı.
Yanvarniñ 28-nde Semena sınav müddetiniñ vaqtından evel toqtatılğanı ve mahkümiyetiniñ lâğu etilüvine dair qararnı aldı.
Mıkola Semena – qırımlı jurnalist, Qırım.Aqiqat müellifi, Ukrainada nam qazanğan jurnalist. 2016 senesi aprel ayında Mıkola Semenanıñ evine FSB hadimleri kelip tintüv keçirdi. Daa soñra jurnalistniñ yarımadanıñ vatandaş qamaçavına dair maqalesi sebebinden cinaiy dava açıldı, dep bildirgenler. Qırım.Aqiqat saytınıñ «Fikir» rubrikasında derc etilgen maqaleni Rusiye tahqiqatçıları Rusiye topraq bütünligini bozmaq çağıruvı (Rusiye topraq bütünligini bozmaq açıq çağıruvları (Rusiye Ceza kodeksiniñ 280.1 maddesi) olaraq tanıdı.
2017 senesi sentâbrniñ 22-nde Aqmescitteki Rusiye mahkemesi Semenanı üç yıl sınav müddeti ve üç yıl açıq faaliyetnen oğraşmaq yasağı ile eki buçuq yılğa şartlı olaraq apiske almağa qarar berdi. Şu yılnıñ dekabr ayında Kreml kontrolindeki Qırım Yuqarı mahkemesi Semenanıñ ükmüni qısmen yımşatıp, açıq faaliyet yasağını eki yılğa qısqarttı.
Mıkola Semenanıñ bildirgenine köre, öz maqalelerinde o, «fikirni serbest bildirüv» aqqını qullanğan edi.
Ukraina Tış işler nazirligi, ABD Devlet departamenti, Avropa Birligi ve bir sıra halqara teşkilât Semenağa çıqarılğan ükümni takbih ettiler.
Radio Free Europe/Radio Liberty sabıq prezidenti Tom Kent jurnalist Mıkola Semenağa qarşı qabaat delilsiz ola, dep aytqan edi. O, Kreml kontrolindeki Qırım mahkemesiniñ qararı lâğu etilmeli, dep qayd etken edi.
Mıkola Semenanıñ imaye tarafı Aqmescitteki Rusiye mahkemesiniñ qararını Avropa insan aqları mahkemesine şikâyet etti. Lâkin Avropa mahkemesi Mıkola Semenanıñ şikâyetini prioritetli baqmağa razı olmadı.
