19 yılğa mahküm etilgen Qırımlı vatandaş jurnalisti Remzi Bekirovnı Krasnoyarsk vilâyetiniñ Yeniseysk şeerindeki 2-nci apishaneden etap ettiler, dep bildirdi onıñ ömür arqadaşı Halide içtimaiy ağlarda.
"Qırım birdemligi" qayd etkenine köre, jurnalistni iyülniñ 5-nde alıp ketecek ediler. Başta Krasnoyarsktaki tranzit noqtasına yollanıldı.
"O yerde çoq qala bilem. Soñra ise maña belli olmağantarafqa alıp ketecekler", — dep yazdı Bekirov mektübinde.
Daa evel FSİN Bekirovnı Qırımğa yaqın bir koloniyağa avuştırmaqnı red etken edi. O, Rusiyeniñ Rostov vilâyetinde apis cezasını çekmek istey edi. Amma FSİN, fevralniñ 24-nden başlap Rusiyeniñ sekiz regionınıñ, şu cümleden Don regionınıñ tüzetüv müessiselerinde "reaksiyanıñ orta seviyesi" tayimn etildi, şunıñ içün onı anda avuştırmaq imkânsız, dep bildirdi.
Remzi Bekirov — vatandaş jurnalisti, "Qırım birdemliginiñ" faali. Jurnalist Qırım sakinlerine qarşı siyasiy sebeplerden açılğan davalar boyunca tintüvler ve mahkemelerniñ yayınlarını alıp bardı, şu cümleden "Veciye Kaşka" davası, arhiyepiskop Klimentniñ tutuluvı, "Hizb ut-Tahrir" ve diger davalar boyunca. Remzi Bekirov Qırım siyasiy mabüsleriniñ qorantalarına yardım etmek ğayesiniñ teşebbüsçisidir.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
