Qırımlı jurnalist Mıkola Semena №7 Aqmescit şeer hastahanesinde ameliyat oldı, dep bildirdi Qırım.Aqiqatqa Radio Svoboda rus hızmetiniñ mühbiri Anton Naumlük.
Berilgen malümatqa köre, noyabrniñ 21-nde №7 Aqmescit şeer hashanesiniñ ekimleri 2018 senesi noyabrniñ 12-nden 13-ne keçer gecesi ameliyat olğan jurnalist Mıkola Semenanı evge yiberdi. Üç saat devam etken ameliyatta Semenanıñ öt quvuğı kesilip alındı ve zafra yollarındaki taşlar alındı.
Noyabrniñ 12-nde Mıkola Semenanıñ qursağı ağırmağa başladı. «İlk yardım» ekimi oña «keskin qarın» diagnozını qoyıp, Semenanı hastahanege aldı. Hirurglar «keskin holetsistit» olğanını aytıp, jurnalistniñ öt quvuğında problemlerni ve qarın zarı yanğısını taptı.
Denilgeni kibi, noyabrniñ 13-nde saat 00.45-te jurnalistniñ öt quvuğı kesilip alındı, qarın boşluğı drenaj yapıldı. Hastağa antibakterial terapiya ve tromb profilaktikası yapıldı.
Semenanıñ advokatı Emil Kürbedinovğa bildirgenine köre, ekimler tikişlerni çıqardı, oña ciddiy diyeta tutmağa tevsiye etildi.
«Hasta yaşağan yerinde ekimlerniñ nezareti altında buluna. Jurnalistniñ alı bir qarar. O, ameliyattan soñ reabilitatsiyadan keçecek», – dep haber ete jurnalist.
Onıñ aytqanına köre, olğan ameliyat aqqında tek noyabrniñ 21-nde haber etmege çare oldı, «çünki bundan evel jurnalistniñ alı yaramay edi ve hastahanede internetke kirmege imkânı olmağan edi».
«Belli ki, bu hastalıq doğru beslenmegen ve stress yaşağan insanlarda ola. Endiden soñ, – dep qayd ete advokat, – belli jurnalistni tek omurğa ve yürek hastalıqları raatsızlamay, azım sistemasınıñ hastalığı – holetsistit – de bar. Añlaşıla ki, bu jurnalistniñ mahkeme tarafından üç yıl devamında qanunsız taqip etilmesiniñ neticesidir».
Oktâbrniñ 2-nde belli oldı ki, Semenağa Kyivniñ kardiologik hastahanesine tedavi körmek içün işğal etilgen Qırımdan çıqmağa izin berilmedi.
2017 senesi sentâbr ayında Aqmescit mahkemesi Semenanı üç yılğa şartlı olaraq apiske alıp, üç yıl deñeme müddeti ve üç yıl devamında açıq faaliyet köstermesini yasaqlamağa talap etti. Aynı o yılnıñ dekabr ayında Kreml nezareti altındaki Qırım Yuqarı Mahkemesi, açıq faaliyet yasağını eki yılğace qısqartıp, ükmüni qısmen yımşattı.
Mıkola Semena, öz maqalelerinde «fikir bildirüv serbestligini» eda etkenini ayta.
Ukraina Tış işleri nazirligi, ABD Devlet departamenti, Avropa Birligi ve bir sıra halqara teşkilâtlar Mıkola Semenağa qarşı çıqarılğan qararnı taqbih ettiler.
Azat Avropa Radiosı/Azatlıq Radiosınıñ sabıq prezidenti Tom Kent, jurnalist Mıkola Semenağa qarşı qabaatlavlarnıñ esassız olğanını söylep, Qırımda Kremlniñ kontroli altında bulunğan mahkeme tarafından çıqarılğan qarar lâğu etilmek kerek, dedi.
