Rusiye quvetçileri uquq qoruyıcı ve jurnalist Lutfiye Zudiyevanı kütleviy aktsiyalar vaqtında "qanun bozulması mümkün olmağanı" aqqında tenbiledi. Bu aqta "Qırım birdemligi" haber ete.
Vesiqada aytıla ki, "kütleviy aktsiyalarnıñ reberleri ve teşkilâtçıları kütleviy aktsiyalarnıñ keçirilüvi aqqında qanun normalarına riayet etüv içün mesüliyetli". Ne kibi tedbirler aqqında söz yürsetilgeni vesiqada qayd etilmey.
Qayd etilgenine köre, bölük memurı Zudiyevanı, aktsiyalar vaqtında yüzüni gizlemek, yanında silâ ve diger telükeli şeyler, patlayıcı maddeler ya da alkogol mahsulatını tutmaq yasaq olğanı aqqında tenbilep, imzalamasını rica etken.
Bundan ğayrı, tenbilevde Zudiyevanıñ kütleviy aktsiya keçirüv tertibini bozğanı, silânı qanunsız satın alğanı, satqanı, saqlağanı, Rusiye Federatsiyasınıñ topraq bütünligine qarşı areketlerge ve ekstremist faaliyetke açıq çağıruvlar yapqanı içün mesüliyetli olğanı qayd etile.
Ne sebepten bu ihtar çıqarılğanını bölük memurı Şevket Kutuzov añlatıp olamadı. O, "böyle vazifeni [vesiqanı teslim etmege] reberlik berdi", dep bildirdi.
Jurnalist tenbilevnen razı olmadı ve Qırımnıñ Rusiye İç işler nazirliginiñ areketleri "sebepsiz" olğanını qayd etti.
Bu kibi tenbilevni daa evel uquqçılar Lilâ Gemeci, Rustem Cemilev ve Sudaqtan cemaat imayecisi Seytosman Qaraliyev aldılar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
