Cuma künü, aprelniñ 23-nde, qırımtatar asıllı ukrainalı yırcı Jamalanıñ «5:45» yañı albomı çıqtı. Bu aqta yırcınıñ matbuat hızmeti Qırım.Aqiqatqa bildirdi.
«Mı» («Biz») plâkı daa altı afta evelsi çıqqanına baqmadan, yırcı mühlislerini eki yıl devamında toplanğan yırlarınen quvandırmağa istedi. Albomğa «Smiyus i plaçu» yırı, o, sound prodüsser İvan Klımenkonen beraber 2019 senesi mart ayında Balide yazılğan edi, ve ukrain hip-hopınıñ yıldızı alyona alyona ile «Jali» dueti, Koloah ve Vakula elektron muzıkacıları ile beraber yazılğan eserler kirdi», – dep bildirdi Jamalanıñ matbuat hızmeti.
Yırcı «5:45» albomında «insan duyğuları dünyası ögrenile», dep tarif etti.
«O, (albom – QA) içine bir baqış aqqında ayta. Anda biraz melanholiya, biraz keder, er şeyni olğanı kibi qarşılağan ve bir şey deñişmeycegini añlağan ruh alıñ bar», – dep ayttı yırcı.
Bundan evel Jamalanıñ «Virü v tebe» yırınıñ yañı video klipi taqdim etildi. Klipniñ qaramanları yırcınıñ ömür arqadaşı Seit-Bekir Suleymanov ve oğulları Emir-Rahman ve Selim-Geray olğanlar.
«Virü v tebe» yırı Jamalanıñ martnıñ 12-nde çıqqan «MI» albomına kirdi. Oña sekiz eser kirdi, hususan «Vdâçna», Agneşka Hollandnıñ «Aqiqat qıymeti» filmi içün Like a Hero yırı ve Qazahistanlı repçi Jah Khalib ile yazılğan «Kohayu» yırı kirdi.
Qırımtatar asıllı ukrainalı yırcı Jamala 2016 senesi İsveçiyada «Eurovisionda» ğalip çıqtı. O, qırımtatar halqınıñ sürgünligini tarif etken «1944» yırını icra etti. Ukrainalı yırcı ğalebe qazanğan soñ 2017 senesi yarış Kyivde keçirilgen edi.
