İşğal etilgen Qırımda 7 yıl apis cezasına mahküm etilgen qırımlı faal İrına Danılovıç açlıq aktsiyasını toqtattırdı. Bunı aprelniñ 6-nda Qırım.Aqiqat mühbirine babası Bronislav Danılovıç haber etti.
"İrına tedaviylev qarşılığında açlıq aktsiyasını toqtattırdı. Bugün onı tibbiy baqınuv içün hastahanege alıp barmaq kerekler, qaysı bir hastahanege belli degil", - dep qayd etti o.
Babasınıñ sözlerine köre, çarşenbe künü Danılovıçnıñ advokatı onen körüşip olğan. İmayeciniñ sözlerine köre, İrınanıñ alı "pek yahşı degil", o alâ qulaq ağrısı, baş aylanması ve baş ağrısından aytına eken.
Cumaaqşamı künü Bronislav Danılovıç qızınen körüşecek ola - SİZO reberligi oña izin bergen.
Martnıñ 22-nde Qırım.Aqiqat mühbiri Qırımda 7 yıl apis cezasına mahküm etilgen vatandaş jurnalisti ve emşire İrına Danılovıç "normal tibbiy tedaviylev kösterilgene qadar ya da ölgence" quru açlıq aktsiyasını ilân etkeni bildirgen edi.
"Dört aydır eşitme qabiliyetim zayıftır ve sol qulağım daima çıñlay, bu maña dayanılmaz ağrı ketire. Böyle alemetler menim mikroinsult keçirgenimni köstere bilir", - dep yazdı faal", - qırımlı faal İrına Danılovıç yazğan edi.
Emşire ve vatandaş jurnalisti keçken sene aprelniñ 29-nda işten evge qaytqanı zaman Rusiye quvetçileri tarafından yaqalanğan edi. İrınanıñ Aqmescit tahqiqat tevqifhanesinde olması yalıñız 13-ünci kün belli oldı. Bütün bu vaqıt tuvğanları ve tanışları onı tapmağa tırıştılar. Olarğa Köktebelniñ kenarındaki yaqıt stantsiyalarından birinde tapılğan İrınanıñ tutıp esir etilmesiniñ video yazısı yardım etti. Adiy urbağa kiyingen bir qaç kişiniñ İrınanı arabağa nasıl itep oturtqanlarını köstere. Bu video esasında faalniñ babası Rusiye polisine ariza ile muracaat eterek, adam tutıp esir etilmesi faktı ile bağlı cinayet davasınıñ başlanmasını talap etti.
Danılovıç emşire olıp çalıştı, içtimaiy ağlarda saifesi ve bir qaç bloger yazısı bar edi. Yazğanları esasen sağlıq hadimleri ve işğal altındaki yarımadada sağlıq problemlerinen bağlı edi.
2022 senesi dekabrniñ 28-nde Qırımdaki Rusiye mahkemesi vatandaş jurnalisti ve emşire İrına Danılovıçnı yedi yılğa apis cazasına makhüm etti. Mahkeme qadınnı Rusiye Ceza kodeksiniñ 222.1 maddesine istinaden «Patlayıcı madde ya da patlayıcı cihazlarnı qanunsız satın aluv, berüv, satuv, saqlav, taşuv, yollav ya da yanında taşımasında» qabaatlı tanıdı. Apis cezasından ğayrı qadın 50 biñ ruble para cezasını ödemeli.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
