Qırımda apis cezasına mahküm etilgen vatandaş jurnalisti İrına Danılovıç Cezalarnı icra etüv Federal hızmetiniñ oña tibbiy yardım köstermekten red etmesi sebebinden 10 kündir açlıq aktsiyasını devam ete eken. Bunı "Gratı" neşri onıñ babası Bronislav Danılovıçqa atfı etip bildire.
"Özüni pek yaramay duyğanını bildire. Başındaki ve qulağındaki dayanılmaz ağrı aqqında tekrar yazdı. Aftanıñ başında şeer mahkemesindeki dava materialları ile tanışması içün Kefe muvaqqat tutuv izolâtorına çıqardılar, soñra bir künge Aqmescit SİZO-sına qaytardılar. Hastahanege alâ daa alıp barmadılar. Meni aldattılar. Martnıñ 29-nda çarşenbe künü tibbiy baqınuv içün alıp keteceklerini degen ediler. Amma dün aqşam Kefedeki muvaqqat tutuv izolâtorında edi", - dedi babası.
Bronislav Danılovıçnıñ sözlerine köre, martnıñ 28-nde o Aqmescitiyeki 1 SİZO-nıñ reis vazifesini icra etken Viktor Harçenko ile körüşken ve o İrına Danılovıçqa tibbiy yardım kösterilecegine ve onı Aqmescit hastahanelerinden birisine göndereceklerini vade etken.
Martnıñ 22-nde Qırım.Aqiqat mühbiri Qırımda 7 yıl apis cezasına mahküm etilgen vatandaş jurnalisti ve emşire İrına Danılovıç "normal tibbiy tedaviylev kösterilgene qadar ya da ölgence" quru açlıq aktsiyasını ilân etkeni bildirgen edi.
Keçende Danılovıçnıñ tuvğanları onıñ sağlığı zayıflaşmağa devam etkenini bildirdirgen ediler.
Emşire ve vatandaş jurnalisti keçken sene aprelniñ 29-nda işten evge qaytqanı zaman Rusiye quvetçileri tarafından yaqalanğan edi. İrınanıñ Aqmescit tahqiqat tevqifhanesinde olması yalıñız 13-ünci kün belli oldı. Bütün bu vaqıt tuvğanları ve tanışları onı tapmağa tırıştılar. Olarğa Köktebelniñ kenarındaki yaqıt stantsiyalarından birinde tapılğan İrınanıñ tutıp esir etilmesiniñ video yazısı yardım etti. Adiy urbağa kiyingen bir qaç kişiniñ İrınanı arabağa nasıl itep oturtqanlarını köstere. Bu video esasında faalniñ babası Rusiye polisine ariza ile muracaat eterek, adam tutıp esir etilmesi faktı ile bağlı cinayet davasınıñ başlanmasını talap etti.
Danılovıç emşire olıp çalıştı, içtimaiy ağlarda saifesi ve bir qaç bloger yazısı bar edi. Yazğanları esasen sağlıq hadimleri ve işğal altındaki yarımadada sağlıq problemlerinen bağlı edi.
2022 senesi dekabrniñ 28-nde Qırımdaki Rusiye mahkemesi vatandaş jurnalisti ve emşire İrına Danılovıçnı yedi yılğa apis cazasına makhüm etti. Mahkeme qadınnı Rusiye Ceza kodeksiniñ 222.1 maddesine istinaden «Patlayıcı madde ya da patlayıcı cihazlarnı qanunsız satın aluv, berüv, satuv, saqlav, taşuv, yollav ya da yanında taşımasında» qabaatlı tanıdı. Apis cezasından ğayrı qadın 50 biñ ruble para cezasını ödemeli.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
