Ekinci "Hizb ut-Tahrir davası"nıñ iştirakçisi Cemil Gafarov, oña Aqmescit SİZOsınıñ hadimleri basqı yapa dey, bunıñ içün onıñ sağlığı zayıflaşa. Bunı advokatı Rifar Yahin bildire.
"Gafarov Qırım SİZOsınıñ hadimleri tarafından temelsiz qabaatlavlar aqqında ayta, sanki kameradan birevniñ perdeleri qapala ve tamam Gafarov bunıñ içün cevap bermeli. Bunıñ temelsiz qabaatlav esasında 2-nci gruppa saqatına psihologik basqı yapıla, bunıñ sebebinden, kerekli tibbiy yardımnıñ olmamasından başqa, müşteriniñ sağlığınıñ yaramaylaşması içün qoşma şaraitler yaratıla", - haber etti advokat.
Daa evel Advokat Rifat Yahin 2020 senesi yanvar ayından berli müvekkili, Aqmescitteki «Hizb ut-Tahrir davasınıñ» mabüsi Cemil Gafarovnıñ uyğun şaraitlerde tutulğanına dair malümat almağanını bildirgen edi.
yünniñ 9-nda berilgen malümatqa köre, Aqmescitteki ekinci «Hizb ut-Tahrir davasınıñ» mabüsi Cemil Gafarovnı Qırımdaki Rusiye insan aqları vekâletlisiniñ muavini Aleksandr Ştekbort ziyaret etti.
Gafarov ombudsmenge muracaat etkenini bildirdi: sağlığınıñ fenalaşuvı ve SİZO şaraitlerinde immuniteti zayıf, hronik hastalıqları ve yaşı büyük olğan insanlarnı qoruv mehanizmleri olmağanınen bağlı eki mesele.
Daa evel Gafarovnıñ advokatı müvekkiliniñ alı kritik oldı, dep qayd etken edi. Cemil Gafarov üçünci derece saqatı, büyrekleri hasta ve yürek hastalıqları bar. Advokat Gafarovğa ilâc bermeyip, hastahanege avuştırmağa razı olmadılar, dep qoştı. Advokat, müvekkiliniñ tibbiy tedqiqlerine dair arizanı Aqmescit SİZOsınıñ memuriyetine berdi.
Fevralniñ 4-nde Rusiye kontrolindeki Qırım ombudsmeni Larisa Opanasük, Aqmescitteki ekinci «Hizb ut-Tahrir» davasınıñ mabüsi Cemil Gafarovnı №1 Aqmescit SİZOsında ziyaret etti, dep bildirgen edi. Onıñ aytqanına köre, Gafarov ombudsmenden saqatlığınıñ uzatılmasında yardım etmesini rica etti. Opanasük bildirgenine köre, o, sağlıq vaziyeti ve SİZOda tutuv şaraitlerini şikâyet etmey.
«Memorial» Rusiye aq qorçalayıcı merkezi Cemil Gafarovnı siyasiy mabüs dep tanıdı.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Edem Yayaçikov – ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
