Qırımlı faallerniñ mahkeme künü (video)

Rusiye kontrolindeki Aqmescit Kiyev rayon mahkemesinde mayısnıñ 31-nde qırımtatar faali, vatandaş jurnalisti Lutfiye Zudiyeva ve Bağçasaraydaki ekinci «Hizb ut-Tahrir davası» mabüsiniñ apayı, «Qırım balalığı» teşebbüsiniñ koordinatorı Mümine Saliyevanıñ davaları boyunca oturışuvlar olacaq. Ekisi de Rusiye Memuriy cinayetler kodeksiniñ 20.3 maddesine istinaden qabaatlana – yasaqlanğan timsallerniñ numayışı. İşbu madde boyunca memuriy apis cezası berile. Rusiye quvetçileri mayısnıñ 30-nda eki qırımtatar faalini tuttı. Daa soñra olar Aqmescitteki «E» Merkezine ketirildi. Ukraina Tış işler naziri Pavlo Klimkin dünya toplulığını mayısnıñ 30-nda ilhaq etilgen Qırımda tutulğan qırımtatar aq qorçalayıcıları Lutfiye Zudiyeva ve Mümine Saliyevanıñ azat etilüvini talap etmesine çağırdı. Al-azırda Qırım ve qomşu Rusiyeniñ müessiseleri bir de bir izaat bermediler.