Rusiyeniñ nezaretinde olğan Aqmescitniñ Kiyev rayon mahkemesi Qırımtatar Qurultayı delegatı Edem Dudakovnıñ davası baqılğan Bağçasaray rayon mahkemesiniñ binası ögünde yaqalanğan qırımtatar faalleri Seydamet Mustafayev ve Amethan Umerovnıñ tevqif müddetini uzattırdı.
"Qırım birdemligi" haber etkeni kibi, faaller 2024 senesi yanvarniñ 23-ne qadar tevqifli qalacaq.
Rusiye FSB-sınıñ temsilcisi tevqif müddetiniñ uzattırılmasını Mustafayev ve Umerov saqlana, tahqiqatqa tesir ete ya da delillerni yoq ete bilmesi ile añlatqan.
"Bütün bu vaqıt devamında Amethan 2-nci sanlı SİZO-da bulunmaq mecbur. Andaki şarait ise ne qadar qattı olğanı bellidir. Sıñırlama tedbiri ise yalıñız azatlıqtan marum etmeni köz ögünde tuta", - dep bildirdi Umerovnıñ advokatı.
«Qırım platforması» sammiti keçirilgen soñ ertesi künü, avgustnıñ 24-nde, Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi. Erkekler tutuldı.
O künü Rusiye kontrolindeki Aqmescitniñ Kiyev rayon mahkemesi Ruslan Asanov, Amethan Umerov ve Remzi Nimetulayevni eki ayğa SİZOda qaldırdı. Tutulğanlar Rusiye Ceza kodeksiniñ 205.5 maddesiniñ birinci qısmına istinaden şübheli sayıldı – terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv. Laf Rusiyede yasaqlanğan Hizb ut-Tahrir teşkilâtı aqqında kete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
