Ukrayinanıñ halqara teşkilâtlar yanındaki Viyana daimiy temsilcisi Emine Ceppar işten çıqqanı aqqında ariza yazdı.
O, Ukrayina tış işler naziri Dmıtro Kulebanıñ adına ariza yazıp, "Tış işler nazirligi sistemasında qalmamağa" qarar alğanını qayd etti.
"Soñki 10 yıl devamında men özümni memleketime ve halqıma hızmetke bağışladım. Bu sebepten, "Qırım Platforması" ömür arzumnıñ amelge keçirilmesinde istilâcınıñ duşmanı olğanım içün, ğıyabiy şekilde apiske alındım ve Rusiye sanktsiya cedveline kirsetildim. Vazife ve şaraitlerge baqmadan, küreşimni başqa şekillerde de devam etecem", — dep yazdı o.
2024 senesi fevral ayında Ceppar Viyanada halqara teşkilâtlar yanında Ukrayina vekili vazifesine tayinlendi, bundan evel Ukrayina tış işler naziriniñ birinci muavini olıp çalıştı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
