İşğal etilgen Qırımdaki Rusiye arbiy komissarlıqlarında tibbiy komissiyalarına reberlik etken ekimlerni Rusiye ordusına asker namzetleriniñ baqıluv neticelerini sahtelemege macburlaylar. Bunı "QırımSOS" aq-uquq qoruyıcı teşkilâtınıñ talilcisi Yevgen Yaroşenko bildirdi.
"İşğal etilgen Qırımda arbiy komissarlıqlarnıñ tibbiy komissiyalarına reberlik etken ekimlerni asker namzetleriniñ baqıluv neticelerini sahtelemege macburlaylar. Bu mecburiyet asker namzetleriniñ sayısını arttırmaq içün yapıla. Qırım sakinleriniñ Rusiye ordusınıñ sıralarına celp etilmesi halqara gumanitar uquqnıñ ciddiy bozuluvı ve arbiy cinayettir", - dedi Yaroşenko.
Onıñ fikrince, bu kibi areketler Rusiyeniñ "Qırımda gizli seferberlik keçirmek" niyeti aqqında haber bere bile.
"Böylece, Qırımda Rusiye pasportını alğan erkekler işğalci akimiyetiniñ areketleri sebebinden telüke altındalar. Resmiy olaraq RF ve işğal etilgen Qırımda askerlikke celp etüv devam etmekte. Amma baqıluv neticeleriniñ sahteleştirilmesi işğalcilerniñ Qırımda gizli seferberlik keçirmek niyeti aqqında haber bere bile", - dep qoştı Yaroşenko.
Al-azırda bu malümatnıñ kerçekligini teşkermek imkânsızdır.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
