Rusiye mahkemesi tarafından "Qırım musulmanları davası" boyunca 14 yıl apis cezasına mahküm etilgen Qırım faali ve cemaat jurnalisti Ruslan Süleymanovnı "ekstremist mefküresine bağlılığı, qaçuv ve ücümge ıntıluv" sebebinden Rusiye Federatsiyasınıñ Çelâbinsk vilâyetindeki Verhneuralsk apishanesinde ihtisasiy cedvelge aldılar.
Bu aqta "Qırım birdemligi" cemaat birleşmesine Ruslannıñ ömür arqadaşı Elzar Süleymanova bildirdi.
Onıñ ömür arqadaşı Elzara Süleymanovanıñ aytqanına köre, aqayı Novoçerkassk SİZO-sından etap etilgen soñ birden ihtisasiy cedvelge alınğan. Bundan da ğayrı, Süleymanovanıñ aytqanına köre, aqayı, yataqta oturğanı içün eki kere zıqı aşağan.
2019 senesi martnıñ 27-nde Qırımda Aqmescitniñ Boğurça ve Mamaq mikrorayonlarında qırımtatarlarnıñ evlerinde bir kereden kütleviy tintüvler keçirildi. Materiallarnıñ büyük miqdarı sebebinden uquq qoruyıcılar 25 qırımtatar cemaat faalinden ibaret olğan cinaiy davanı beşer böldiler. Yaqalanğanlarnıñ aman-aman episi vatandaş jurnalistleri ya da cemaat faalleri edi.
2022 senesi noyabrniñ 24-nde Rusiyeniñ Rostov-na-Donu şeerindeki Cenübiy okrugınıñ arbiy mahkemesi "Qırım musulmanları davası" boyunca beş qırımtatarğa üküm çıqardı. Vatandaş jurnalisti Ruslan Süleymanovnı mahkeme 14 yıl sert rejimli koloniyada qalmasına üküm etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
