Qırımtatar vatandaş jurnalisti, bloger Nariman Memedeminov Rusiyeniñ Rostov-na-Donu şeerindeki SİZO-1 mahsus blokunda buluna. Bu aqta «Qırım birdemligi» cemaat birleşmesi advokat Emil Kurbedinovnıñ malümatına esaslanıp haber ete.
Onıñ aytqanına köre, SİZO memuriyeti bunı aydınlatacaq bir de bir vesiqalı izaat bermedi.
«Terror» maddeleri boyunca qabaatlanğan şahıslarnıñ bunıñ kibi mahsus bloklarğa qapatuv aqqında ağzaviy şekilde aytıldı. İmaye böyle avuştıruvnıñ sebeplerini ögrenmege istey», – dedi Kurbedinov.
SİZO reberligi ve Rusiyeniñ Cezalarnı yerine ketirüv federal hızmetiniñ vekilleri şimdilik açıq bir izaat bermedi.
Rusiyeniñ Rostov-na-Donu şeerindeki Şimaliy-Kavkaz okrugınıñ arbiy mahkemesi mayısnıñ 29-nda qırımtatar vatandaş jurnalisti, bloger Nariman Memedeminovnıñ davasını iyünniñ 10-nda baqmağa qarar aldı.
2018 senesi martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
