Rusiye mahkemesi tarafından 13 yılğa mahküm etilgen qırımlı Aziz Ahtemov oktâbrniñ 6-nda Rusiyeniñ Altay ülkesiniñ Rubtsovsk şeerindeki 10-ncı tüzetüv cezahanesine etap etildi. Bu aqta qırımtatar faali Elmaz Akimova öz Facebook saifesinde bildirdi.
Haberge köre, Aziz Ahtemov 2 afta devam etecek karantinde buluna. Bu aqta o, "Zonatelekom" rusiye servisiniñ yardımınen qorantasına bildirdi.
Qırımlı Aziz Ahtemov, bir buçuq aydan soñ Krasnoyarsk vilâyetiniñ Yeniseysk 2-nci apishanesinden Rusiyeniñ Novosibirsk vilâyetiniñ 1-nci SİZO-sına etapnen kelip çıqqanını bildirgen edi.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Oktâbrniñ 2-nde ağa-qardaş Ahtemovlar Aqmescitteki SİZO-2-den alındı ve Rusiye apishanelerine etap etildi.
2023 senesi noyabr ayında Aziz Ahtemov Qırımdan Krasnoyarsk ülkesiniñ Yeniseysk şeerindeki apishanege 40 kün devamında etap etildi, cep haber etilgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
