Qırımda aq qoruyıcı Abdureşit Cepparov 15 künlük memuryi tevqiften soñ azat etildi. O, içtimayi ağlarda "natsist atributikası ve timsalleriniñ propagandası" ile qabaatlanğan edi. Bunı "Qırım birdemligi" cemaat birleşmesi haber etti.
"Men 15 kün tevqifli edi. 15 kün bu nedir? Çoqusı ballarımız 10-15 yıl otura. Allah bersin, tezden azat olsunlar, qorantaları ile qavuşsınlar. Halqımıznıñ arasında 100-den ziyade adam tevqiflidir", - dedi Cepparov.
Martnıñ 16-nda saba Rusiye uquq qoruyıcıları Qarasuvbazarda aq qorçalayıcı, qırımtatar areketiniñ veteranı Abdureşit Cepparovnıñ evinde tintüv keçirdi. Cepparovğa advokatlar kirsetilmedi. Tintüvden soñ Rusiye uquq qoruyıcıları Cepparovnı Qarasuvbazar rayon polis bölügine alıp ketti. Rusiye uquq qoruyıcıları tintüv ve sebepleri aqqında resmiy şekilde bildirmey.
Qırımtatar faalleriniñ bildirgenine köre, martnıñ 16-nda saba aq qorçalayıcı Abdureşit Cepparovnıñ evinde keçirilgen tintüv vaqtında tutulğan qırımtatarlar Muhammed Ali Cepparov ve Fevzi Yakubovnıñ bulunğan yeri belli degil edi. Soñra belli olğanına köre, olar Qarasuvbazar rayon bölüginde buluna. Advokat Emil Kurbedinov olarğa uquqiy mesleat yapması içün kirsetilmedi.
Ukraina Tış işler nazirligi ve Ukraina prezidentiniñ Qırım Muhtar Cumhuriyetindeki temsilciligi üç qırımtatarını azat etmege çağırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
