Ukraina prezidentiniñ QMC-deki daimiy temsilciligi Qırımlı advokat Emine Avamilevağa Ukraina prezidenti Volodımır Zelenskıydan «Ukrainada nam qazanğan advokat» fahriy unvan berilmesi munasebeti ile tebrik etti.
«Avamileva Emine 1990-cı yıllardan berli Ukrainada qanun aliyligi printsiplerini qurıp, vatandaş cemiyetiniñ şekillendirilmesi ve inkişafı içün çoq sayıda leyhalarnı koordinatsiya etti ve ömürge keçirdi. 2014 yıldan berli onıñ advokat faaliyetiniñ esas saası – Qırımnıñ tamır qırımtatar halqınıñ aqlarınıñ qorunmasıdır; Qırım MC ve Aqyar şeeriniñ muvaqqat işğali şaraitinde Rusiye Federatsiyası taarfından taqip etilgen Ukraina vatandaşlarına qarşı siyasiy davalarda mudafaacı advokat olması», – dep yazıla temsilcilikniñ saifesinde.
Avamilevanıñ, digerleri ile beraber 2018 senesi noyabr ayında Keriç boğazında Rusiye tarafından esir etilgen Ukraina deñizcisi Vladislav Zinçenkonıñ advokatı olğanı bildirile.
«Emine hanımnı qazanğan devlet mukâfatı munasebeti ile hayırlaymız ve muvaqqat işğal etilgen Qırımda insan aqlarınıñ qorunması oğrunda küreşni devam etken er kesni bu kibi mukâfatlar tapılması içün çalışmağa devam etemiz», – dep qoştılar temsilcilikte.
