Aqmescitte rus polisi qırımlı advokat Edem Semdlâyevge qarşı Rusiye Memuriy uquq bozma kodeksiniñ 19.3 maddesine binaen (poliske boysunmamazlıq) protokol tizdi. Bunı Qırım.Aqiqatqa advokat Ayder Azamatov bildirdi.
Onıñ sözlerine köre, Semedlâyevge qarşı eki protokol tizilgen.
"Polis hadimleri Edem Semedlâyevge polis hadimlerine boysunmamazlıq içün protokol tizdi. O, ROVD hadimleriniñ areketlerini foto ve videoğa çıqara edi. Şimdi ise aynı maddege binaen şahsiy teşkerüv vaqtında soyunmağa red etkeni içün daa bir protokol tizeler", - dedi Azamatov.
Bugün quvetçiler Rusiyeniñ nezaretinde olğan Qırım garnizon arbiy mahkemesiniñ binası ögünde 21 adamnı tuttı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
