Cumaaqşamı künü, dekabrniñ 6-nda, saba Rusiye uquq qoruyıcıları tarafından tutıp alınğan Emil Kürbedinov Kreml kontrolindeki Aqmescitniñ Kiyev rayon mahkemesine ketirildi.
Şaatlarnıñ aytqanına köre, mahkeme ayatında insanlar nevbetçilik yapa. Kürbedinovğa qoltutmaq içün mahkeme binasına bir qaç on insan keldi.
Advokat 2013 senesi Facebookta paylaşqanları içün memuriy apis cezasını ala bile. Kürbedinovnıñ zenaatdaşları dey ki, onı Dimaşqqa köçken Qırımnıñ sabıq sakini şikâyet etti.
Qırım.Aqiqat mühbiriniñ bildirgenine köre, Rusiye ve Qırım kütleviy haber vastaları oturışuv başlaması ögüne mahkemede toplaştı.
Dekabrniñ 6-nda Qırımda Rusiyeniñ Ekstremizm ile küreş merkeziniñ hadimleri advokat Emil Kürbedinovnı tutıp aldı. Onı Rusiye Memuriy cinayetler kodeksiniñ 20.3 maddesini bozğanında şekleyler.
Qırımdaki Rusiye İç işler nazirliginiñ idaresi bu malümatnı daa izaatlamadı.
Rusiyeniñ Ekstremizm ile küreş merkeziniñ hadimleri ve üyken prokuror Valentin Çuprina Emil Kürbedinovnı ekstremizm ve terrorizm qanunları bozulamaz, dep tenbiyelegen edi.
Oktâbrniñ 27-nde Aqmescitte keçirilgen «Qırım birdemliginiñ» toplaşuvına Rusiye prokuraturasınıñ vekilleri ve kimligi belli olmağan maskalı insanlar, em de politsiya hadimleri keldi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
