Qırımlı advokat Emine Avamileva "E" merkeziniñ hadimleri tarafından yaqalanıp, mayısnıñ 28-nde mahkemeniñ qararı ile beş küngen tevqif etilgen soñ azat etildi. Bunı "Qırım birdemligi" cemaat birleşmesi haber ete.
"Bu iç bir şekilde bizim insan noqta-i nazarımızğa, amma advokatlar olarakh bizim zenaat noqta-i nazarımızğa tesir etmeycek. Bizge işanğanlarğa yardım ete edik. Bizge qarşı memuriy ceza maddesi qullanılğanına baqmadan, biz faaliyetimizni devam etecekmiz", - dedi Avamileva.
Qırımnıñ sakinleri mayısnıñ 26 ve 27-nde tutulğan dört advokat Edem Semedlâyev, Nazim Şeyhmambetov, Ayder Azamatov ve Emine Avamilevanıñ destegine baştalığan "Halq mudafaacıları" onlayn fleşmobda iştirak eteler.
Mayısnıñ 26-nda Aqmescitte Rusiye uquq qoruyıcıları tarafından tutulğan qırımlı advokat Edem Semedlâyev Qırımda Rusiye Federatsiyası ordusınıñ Ukrainada yapqanlarını «itibardan tüşürgeni» içün 75 biñ ruble para cezasını aldı.
Şu künü Rusiye quvetçileri Aqmescitte mahkeme binası yanında advokat Edem Semedlâyevge uquqiy yardım köstergen advokat Nazim Şeyhmambetovnı yaqaladı. Qırımda Rusiyeniñ nezaretinde olğan Aqmescitniñ Merkeziy rayon mahkemesi qırımlı advokatqa sekiz kün memuriy apis cezasını berdi.
Ertesi künü Aqmescitte Rusiye polisi daa eki Qırımlı advokatnı - Ayder Azamatovnıve Emine Avamilevanı yaqaladı. Rusiye kontrolindeki Aqmescitniñ Merkeziy rayon mahkemesi qırımlı advokat Azamatovğa sekiz kün, Avamilevağa beş kün idariy apis cezasını bermege qarar aldı.
Ukrayina aq qoruyıcıları Qırımda advokatlarnıñ tutulmasınu takbih ettiler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
