Oktâbrniñ 26-28 Dublin qalesinde Front Line Defenders büyük uquq qoruyıcı platforması keçirile. Bu platformada qırımlı advokat ve ukrayin uquq qoruyıcısı Diana Berg iştirak ete.
Teşkilâtçılarnıñ qayd etkeni kibi, tedbirde bütün dünyadan 100-den ziyade uquq qoruyıcı iştirak ete.
"Uquq qoruyıcılar ve olarnıñ mudafaa etken azatlıqlar yaşayışımızda iç bir vaqıt olmağanı kibi ücümlerge oğratıla ve dünyanıñ er bir bölgesinde devletler vatandaş cemiyetine qarşı basqılarnıñ artması ile qarşılaşa", - dep bildirdi Front Line Defenders icra müdiri Endrü Anderson.
Onıñ sözlerine köre, Dublin platforması zayıf uquq qoruyıcılarğa "toplanmaq, birleşmek ve telükesizlik strategiyasını azırlamağa" imkân bere.
"Bu uquq qoruyıcılarnıñ dünyanıñ eñ basqıcı ükümetlerinden bazılarınıñ tarafından qarşılaşqan suistimallar aqqında qonuşa bilecek bir forum olğanı damüimdir", - dep qoştı o.
İlk Front Line Defenders forumı 2002 senesi keçirildi.
Front Line Defenders 2001 senesi Dublinde yaratılğan halqara uquq qoruyıcı teşkilâttır. Onıñ maqsadı telüke altında olğan uquq quoryıcılarnı qorumaqtır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
