Ekstremistik timsallerni numayış etüv maddesi boyunca 10 künge apiske alınğan qırımlı uquq qoruyıcı ve adliyeci Rustem Kâmilev Aqmescitte Pavlenko soqağı, 1A, mahsus bir tevqiv merkezinde buluna. Bunı advokat Edem Semedlâyev bildirdi, dep haber ete "Qırım birdemligi".
Qayd etilgenine köre, bugün saba uquqçı Rusiye kontrolindeki Qırım Yuqarı mahkemesine şikâyet arizasını berdi.
"Qarar çıqarılğanda memuriy qanunlar bozulğanını tüşünem. Mahkeme dava malümatlarını tam ve obyektiv şekilde ögrenmedi", — dep qayd etti Semedlâyev.
Olarnıñ arasında uquq bozuluvı olmağanını ve ekstremistik timsallerni köstermege niyetlengenini qayd ete.
Noyabrniñ 7-sinde «Qırım birdemligi» cemaat areketiniñ uquqçıları Rustem Kâmilev ve Lilâ Gemeciniñ evine Rusiye polis hadimleri keldi.
Tintüvlerden soñ Kâmilevni tutıp, Aqmescit şeerindeki Ekstremizm ile küreş merkezine alıp kettiler, anda eki memuriy protokol tizildi. Birisi 2020 senesi paylaşuvnen bağlıdır. Bu yazıda ukrayin faali Oleg Prihodko aqqında aytıldı. Fotoresimde Prihodko bayraq ve Trizub resimi olğan kâğıtnı tutıp tura.
Soñra Kâmilev Rusiye mahkemesine yollanıldı, anda «natsist timsalleriniñ propagandası ya da açıq numayış etilüvi» maddesine istinaden 10 künge apiske alındı ve Rusiye ordusınıñ «itibardan tüşürilüvi» iddia etilgeni içün 50 biñ ruble para cezasını aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
