Rusiye kontrolindeki Qırımnıñ İslâm Terek rayon mahkemesinde Noman Çelebicihan batalyonınja iştirak etüv davası boyunca (Rusiye Ceza kodeksiniñ 208-inci maddesiniñ 2-nci qısmı) qabaatlanğan Mecit Ablâmitovnıñ üç şaatı sorğuğa çekildi. Advokat Ayder Azamatovnıñ Qırım.Aqiqatqa bildirgenine köre, sorğu «qabaatlav delilleriniñ sahte» olğanını tasdıqladı.
Mahkemede Mecit Ablâmitovnıñ doğmuş qardaşı Adler Ablâmitov ve şaat Aydın Mamutovnen tahqiqat tedbirlerinde iştirak etken Rusiyeniñ Stavropol koloniyasınıñ eki hadimi sorğuğa çekildi.
«Bugün koloniyanıñ eki hadimini sorğuğa çektik, olar daa evel Noman Çelebicihan batalyonında iştirak etkeni içün mahküm etilgen Aydın Mamutov ile tahqiqat tedbirlerinde iştirak etti. Dava malümatlarında bu hadimlerniñ şaat olaraq sorğuğa çekilgeniniñ protokolları bar edi, faqat mahkeme oturışuvı vaqtında eki hadim şaat olaraq sorğuğa çekilmegenini ve şaat sorğusınıñ protokollarını imzalamağanlarını bildirdi», – dep tarif etti advokat Ayder Azamatov.
Advokatnıñ fikirince, mahkemede şaatlarnıñ sorğusı «qabaatlav delilleri sahte» olğanını tasdıqladı.
«Bu, tahqiqat bu hadimlerni haberdar etmeyip, sahtelev yapqanını tasdıqlay. Özleri de bu vesiqalarnıñ sahtesini yapqandırlar – bu delillerniñ sahte olğanını köstere. Bugün imaye bu malümatnı teşkerip, bu delillerni çıqarmağa talap etti. Prokuror, bu delillerge esaslanmaycaq, dep bildirdi, amma bu da añlaşıla, çünki bugün mahkemede şaatlar şaatlıq etmegenini ve protokol imzalamağanını ayttı», – dep qoştı advokat.
2020 senesi avgustnıñ 19-nda Rusiye FSBsi «ukrain milliy batalyonında» iştirak etkeninden şübheli sayılğan Qırımnıñ İslâm Terek rayonınıñ sakinini tuttı, dep bildirdi. İslâm Terek rayonınıñ sakinine qarşı cinaiy dava açıldı. Al-azırda şübheli tutuldı. FSB, qırımlı 2016 senesi esas Ukrainağa ketip, «Lenur İslâmov qurğan N.Çelebicihan batalyonına» kirdi, dep bildire.
Qırım Muhtar Cumhuriyetiniñ prokuraturası «Noman Çelebicihan göñülli qırımtatar batalyonında» iştirak etkeni içün Ukraina vatandaşınıñ qanunsız tutuluvı ve evinde tintüv keçirilüvi boyunca cinaiy tahqiqat başlattı.
Daa evel Qırımda qurucısı Lenur İslâmov olğan «Noman Çelebicihan göñülli batalyonınıñ» azaları olaraq tanılıp qabaatlanğan üç qırımtatarına qarşı qabaatlayıcı qarar çıqarılğan edi. Bu birleşmeniñ azaları olğanınen bağlı şübheler ile qırımlılarğa qarşı eki ğıyabiy qarar da çıqarıldı.
