Qırımlı siyasiy mabüs («Memorial» aq qorçalayıcı merkezi tarafından tanıldı), Aqmescitteki «Hizb ut-Tahrir davasınıñ» mabüsi Teymur Abdullayev aman-aman 5 ay keçirgen ceza izolâtorından sert tutuv şaraitli kamerağa avuştırıldı. Bu aqta ömür arqadaşı Alime Abdullayeva «Qırım birdemligine» bildirdi.
Abdullayev Başkortostan Cumhuriyetiniñ Salavatındaki №2 koloniyasında yata.
«O, (Abdullayev – QA) uzun zamandan berli ilk sefer resmiy bağdan telefon etti. Onı 141 kün keçirgen ceza izolâtorından avuştırğanlar. Sert tutuv şaraitli kamerağa avuştırğanlar. Kamerada 15 insan buluna ve tek olarnen laf etip ola», – dep bildirdi Alime.
Başkortostandaki Cezalarnı yerine ketirüv federal hızmetiniñ idaresi Abdullayevniñ ceza izolâtorından sert tutuv şaraitli kamerağa avuştıruv sebeplerini açıq şekilde izaatlamay.
Ukraina ombudsmeni Lüdmila Denisovanıñ aytqanına köre, Teymur Abdullayev «120 künden berli ceza izolâtorında sebepsiz tutula».
İyünniñ 26-nda advokat Emil Kurbedinov Rusiye Baş prokurorı İgor Krasnovğa şikâyet yollap, Başkortostan prokuraturasınıñ hadimlerini intizam mesüliyetke çeküv ve areketlerini teşkerüv yapılsın dep israr ete.
Rostov-na-Donunıñ Cenübiy okrugınıñ arbiy mahkemesi bu davanıñ mabüslerine 2019 senesi iyün ayında üküm çıqardı.
Daa soñra Rusiye Yuqarı mahkemesi qırımlılarnıñ ükmüni deñiştirdi.
Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov 11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñ ükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
2019 senesi iyün ayında Rostov-na-Donunıñ Cenübiy okrugınıñ arbiy mahkemesi bu dava mabüsleri Teymur Abdullayevni 17 yılğa, Uzeir Abdullayevni 13 yılğa, Rustem İsmailovnı 14 yılğa, Ayder Saledinov ve Emil Cemadenovnı 12 yılğa üküm etti.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
