Bu aqta "Suspilne Qırım" yayınlayıcısına Ukrayina prezidentiniñ QMC-deki daimiy temsilcisiniñ muavini Denis Çıstıkov bildirdi.
"Bugün, bilemiz, Kavkaz limanında paromğa ücüm etildi. Liman Keriç limanınıñ qarşı tarafında yerleşken. Ve ukrayin uçaqlarınıñ ücümi muvafaqiyetli oldı. Bu, parom keçitinde olğan ekinci ücümdir. Bunı qullanğan grajdanlarnıñ sayısı azlaşacaq. Amma şunı da qayd etmek kerek ki, parom keçitinde Rusiye arbiyleri vatandaşlarnı örtü olaraq qullanalar, çünki er seferde Rusiye arbiyleri ve tehnikanıñ büyük qısmı bar", — dep bildirdi Çıstıkov.
O şunı da qayd etti ki, ukrayin tarafı ve arbiyler paromnıñ qullanıluvı mümkün olmağanını tenbiyelediler, çünki bu telükeli. Çıstıkovnıñ aytqanına köre, al-azırda işğalciler quru koridornı qullana.
"Bundan olar Rusiye Federatsiyası ve işğal etilgen Qırım arasında demiryol qurulğanını ilân eteler. Mariupol şeerine demir yolunıñ qurulmasından ğayrı olar kerçek adımlar atmadılar. Belli bir qısmı suniy şekilde yaratılğan büyük nevbetler sebebinden qatnay. Şimdi bazı avtobus marşrutları quru yollardan keçkenini haber eteler ve bu, onıñ telükesizligini köstermek içün yapıla ve avtomobil aqını bu yollardan keçsin dep, yapıla, çünki şimdi bu quru yollar talap etilmey", — dep yekünledi Çıstıkov.
İyülniñ 23-nde saba Rusiye Federatsiyasınıñ Krasnodar ülkesiniñ gubernatorı Veniamin Kondratyev "Kavkaz" limanında paromğa pilotsız uçaqlar ücüm etkenini ve anda yanğın çıqqanını bildirdi. Memur ekipaj azaları ve liman hadimleri arasında elâk olğan ve yaralanğanlar aqqında yazdı, amma tafsilâtlı malümat bermedi.
"Kavkaz" limanı Keriçten 15 kilometr uzaqlığında buluna ve Keriç boğazı boyunca parom vastasınen Rusiye Federatsiyasınıñ territoriyasını Qırım ile bağlay. Anda ihracat neftini taşuv içün yük terminalı yerleşken. Mayısnıñ soñunda, arbiy quvetlerniñ bu limanda yerleşken neft terminalına ücüm etkenleri aqqında haber etilgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
