Avropada ABD ordusınıñ sabıq komandanı general Ben Hodjes, Ukrayina Keriç köprüni bozacaq imkânlarğa saip olğanını ve, onıñ fikrince, kerekli vaqıt kelgende, bunı yapacağını bildirdi. Bu aqta o, Azatlıq Radiosına bergen intervyüsında ayttı.
"Men deyim ki, general Budanov (Ukrayina istihbaratınıñ yolbaşçısı Kırılo Budanov — QA) azır olğanda bunı yapacaq. Bilesiñizmi, men er vaqıt Qırımnı bu cenkniñ esas territoriyası dep saya edim. Rusiye 2014 senesi qanunsız sürette ilhaq etken Qırımnı coysa, onı bütünley coysa — bu eñ müim şey, rusiyeliler içün eñ müim şey. Qırımğa anahtarı — başta onı izolâtsiya etmektir. Bu, elbette, köpürniñ bozulması ve quruda kirişniñ toqtatılması demektir", — dep qayd etti Hodges.
Onıñ aytqanına köre, Ukrayina uzaq mesafeli imkânlarını faal inkişaf ettire ve kerekli vastalarğa, şu cümleden pilotsız uçaqlarğa ve maqsatqa irişken raketalarğa saiptir. Faqat Keriç köprüni yoq etmek içün bayağı silâ kerek olacaq.
"Ukrayina öz imkânlarını inkişaf ettirmege devam ete. Şübesiz ki, böyle mesafelerge irişe bilgen uçaqları ve silâları bar. Amma bu vaqıt alacaq... yani bu büyük bir köpür. Büyük olğan. Bu köpürni bir raketa ya da bir pilotsız uçaq ile yoq etip olamazsıñız, bunıñ içün bayağı patlayıcı kerek olacaq", — dep qayd etti Hodjes.
O, şunı da qayd etti ki, Rusiye köpürniñ strategik telükesizligini añlay ve onı qorçalamaq içün faal adımlar atmaqta. Amma, Hodjesniñ qayd etkenine köre, tarihta yahşı qorçalanğan obyektlerge qarşı muvafaqiyetli operatsiyalarnıñ misalleri çoq.
Soñunda Hodjes, ukrayin tarafı Rusiyeniñ kritik infrastrukturasına darbe endirmek içün kerekli er şeyge saip ve areket etmege azır, dep qayd etti.
Keriç köprü Rusiye içün em işğal etilgen Qırımnı temin etmek, em de Ukrayinağa qarşı cenkni devam ettirmek içün canlı quvet, tehnika ve silânı ketirmek içün strategik emiyetke saiptir.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
