Qırımdan siyasiy mabüs İvan Yatskinniñ tutulğan Rusiye cezahanesiniñ müdiriyeti oña kerekli tibbiy yardım köstermey, yaralarnı tedaviy etmek içün sarğı ve malzemeler bermey. Bunı Qırım.Aqiqat mühbirine siyasiy mabüsniñ ömür arqadaşı Gülnara Kadırova Yatskinniñ advokatna atıf etip aytıp berdi.
Gülnara Kadırovanıñ añlatqnı kibi, aqayınıñ Lefortovo apishanesinde tutulğanda ayaqlarını buzlatqan soñ trofik ülseri ve diger ağır neticeler bar, bunıñ içün onıñ ilâclarğa ihtiyacı bar. Amma oña yollanğan ilâclarnı bermeyler, sebep ilâclar cezahanege ketirilmeli eken. Yatskinniñ yazılı şikâyetleri ise cevapsız qala.
Bundan ğayrı onı ailesi ile laf etme aqqından marum ete ekenler. Daa oña bütün mektüplerni bermeyler, onıñ da yazğan bütün metüpleri ailesine barıp yetmey eken.
Daa Gülnaranıñ sözlerine köre, diger apislilerni siyasiy mabüske kene qarşı qoyalar. Cezahanede Yatskinniñ milleti yeudi dep malümat darqatqanlar ve Sektor Gazadaki arbiy çatışma neticesinde diger musulman siyasiy mabüsler oña duşmanca baqıp başlağan.
2021 senesi mayısnıñ 21-nde Rusiye nezaretinde olğan Qırımnıñ Yuqarı mahkemesi «devlet hainliginen» qabaatlanğan Qırım sakini İvan Yatskinge üküm çıqardı. Alla Hineviçniñ reisliginde qadılar kollegiyası İvan Yatskinni bir yıl sıñırlav ile 11 yıl sert apis cezasına mahküm etti.
Qırımnıñ Curçı rayonınıñ Aybar (Voykovo) köyüniñ sakini İvan Yatskin 2019 yılda oktâbr 16-sında tutuldı. Bu dekabr ayında belli oldı. Rusiye tahqiqatı, Yatskin Qırımda olıp, UMT ile işbirlik yaptı ve «Rusiyeniñ devlet sırı» olğan malümatnı olarğa bildirdi, dep iddia ete. Qırım.Aqiqatnıñ Ukrayina telükesizlik hızmetine yollağan muracaat cevabında İvan Yatskin UTH ile işbirlik yapmadı, dep aytıla.
«Memorial» aq qorçalayıcı merkezi İvan Yatskinni siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
