SBU, Rusiyeniñ silâlı istilâsını ve Rusiye Federatsiyasınıñ arbiy cinayetlerini aqlağan Qırım siyasetşınasınıñ şübheli olğanını bildirdi. Bunı SBU matbuat hızmeti bildire.
Qırım.Aqiqat menbalarınıñ malümatına köre, söz Denis Baturin aqqındadır. Taqiqatnıñ malümatına köre, o, öz beyanatlarında Ukrayinanıñ bütün toprağını zapt etmege çağıra ve Ukrayina Silâlı quvetlerini itibardan tüşüre edi.
"Hususan, o, Rusiyeniñ Ukrayinağa qarşı cenkine — demilitarlaştıruv, dep ayta edi, em de Rusiyeniñ cinayetlerini aqlay edi, şu cümleden grajdan infrastrukturasına raketa darbelerini de", — dep yaza SBU.
Bundan da ğayrı, qayd etile ki, Baturin 2014 senesinden berli Rusiye akimiyetinen işbirlik tuttı ve Rusiye kontrolindeki Qırım Cemaat palatasınıñ azası edi.
Toplanğan deliller esasında, Baturin 436-2 maddesiniñ 3-nci qısmına istinaden (Rusiye Federatsiyasınıñ Ukrayinağa qarşı silâlı tecavuzını aqlav, qanuniy olaraq tanımaq, red etmek, onıñ iştirakçilerini şereflendirmek) şübheli sayılğanını bildirdi.
Bundan evel Qırım Muhtar Cumhuriyetiniñ prokuraturası bölüginiñ yolbaşçısı Yegor Rebrov Qırım.Aqiqat Radiosınıñ efirinde bildirdi ki, 2024 senesi Qırım prokuraturasınıñ taqiqat materialları boyunca qırımlılarnı arbiy cinayetlerde ve Ukrayinanıñ milliy havfsızlığı esaslarını bozğanında qabaatlap, 141 üküm çıqarıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.