Rusiye işğal etken Qırımdan ilk 30 ekim qıta Ukrayinanıñ Rusiye ordusı tarafından işğal etilgen topraqlarına, hususan Donetsk ve Lugansk vilâyetlerine yollanıldı. Bunı Ukrayina Prezidentiniñ Qırım MC-deki daimiy temsilciligi açıq menbalarğa atfı etip bildire.
Temsilcilikte qayd etkenleri kibi, ekimlerni muvaqqat zapt etilgen Mariupolge de yollağanlar.
Evel, işğal etilgen Qırımdan ekimler Rusiye viran etken Mariupolde hastalrnı qabul etkeni aqqında haber etilgen edi.
Mariupol mart başından berli qamaçavda edi, askerler «Azovstal» maden kombinatında blok etildi.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
