Cemaat jurnalisti ve emşire İrına Danılovıç Aqmescit SİZO-sında bulunğanda insult keçirgen. Bunı ZMINA teşkilâtınıñ temsilcisi Viktoriya Nesterekno haber etti, dep bildire Ukrinform.
"İrına Danılovıç daa Aqmescit SİZO-sında bulunğanda bir ya da bir qaç insult keçirdi. Şimdi onı Rusiyege etap ettiler, anda uquq qoruyıcılarnıñ yardımı ile onı ekimge kösterilmesine, taliller alınmasına irişip oldıq. MRT insult keçirgenini tasdıqladı. Tahmin etilgeni kibi de çıqtı", - dep ayttı o.
Nesterekno, faal otitnen hastalanğanını da qayd etti.
"Sağlığı kettikçe fenalaşqanından aytına edi. Oña bir kere bile tibbiy yardım köstermediler. Uquq qoruyıcılar ve soy-sopu ise toqtamadan bunı talap ete edi. Netice - onıñ bir qulağı eşitmey", - dep qayd etti Nesterenko.
Emşire ve vatandaş jurnalisti keçken sene aprelniñ 29-nda işten evge qaytqanı zaman Rusiye quvetçileri tarafından yaqalanğan edi. İrınanıñ Aqmescit tahqiqat tevqifhanesinde olması yalıñız 13-ünci kün belli oldı. Bütün bu vaqıt tuvğanları ve tanışları onı tapmağa tırışa edi. Olarğa Köktebelniñ kenarındaki yaqıt stantsiyalarından birinde tapılğan İrınanıñ tutıp esir etilmesiniñ video yazısı yardım etti. Video adiy urbağa kiyingen bir qaç kişiniñ İrınanı arabağa nasıl itep oturtqanlarını köstere. Bu video esasında faalniñ babası Rusiye polisine ariza ile muracaat eterek, adam tutıp esir etilmesi faktı ile bağlı cinayet davasınıñ başlanmasını talap etti.
Danılovıç emşire olıp çalışa edi, içtimaiy ağlarda saifesi ve bir qaç bloger yazısı bar edi. Yazğanları esasen sağlıq hadimleri ve işğal altındaki yarımadada sağlıq problemlerinen bağlı edi.
2022 senesi dekabrniñ 28-nde Qırımdaki Rusiye mahkemesi vatandaş jurnalisti ve emşire İrına Danılovıçnı yedi yıl apis cazasına makhüm etti. Mahkeme qadınnı Rusiye Ceza Qanunnamesiniñ 222.1 maddesi ile «Patlayıcı madde ya da patlayıcı cihazlarnı qanunsız satın aluv, berüv, satuv, saqlav, taşuv, yollav ya da yanında taşımasında» qabaatlı tanıdı. Apis cezasından ğayrı qadın 50 biñ ruble para cezasını berildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
