İşğal etilgen Qırımda bulunğan ukrayinlerni yarımadını terk etmege çağırdılar. Buña ait bildirüvni Ukrayinanıñ vaqtınca işğal etilgen topraqlarınıñ reintegratsiya meseleleri naziri İrına Vereşçuk yaptı.
"Ukrayinlerni imkân olsa Qırımnı terk etmege daa bir kere çağıram. Yarımadanıñ işğalden azat etilmesini nezaret astında olğan territoriyada ya da üçünci memleketlerde keçirmege çağıram", - dep qayd etti o.
Sentâbrniñ 23-nde saat 08:22 Aqyarda küçlü patlav sesi eşitildi, dep bildirdi Qırım.Aqiqat mühbiri.
Sentâbrniñ 22-nde kündüz işğal altındaki Aqyarda bir qaç patlav aqqında haber etildi. Şeerniñ Rusiye valisi Mihail Razvojayev Telegramda Rusiye Qara deñiz flotunıñ ştabına raketa darbesi endirildi, dep haber etti.
Rusiye Mudafaa nazirligi darbeden soñ bir arbiy ğayıp oldı, ava mudafaa quvetleri beş raketa urıp tüşürgen, dep bildirdi. Aynı vaqıtta içtimaiy ağlarda darbe neticesinde altı kişi yaralandı, dep yazalar. Bu malümatnı tasdıqlaycaq resmiy bir delil yoq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
