Keriç Boğazında zapt etilgen Ukraina deñizcileri içün birinci künlerde 100 000 ğrıvnâdan çoq, aş ve urba toplağan Qırımdaki ukrainler ve qırımtatarlar Rusiyeni qorquzıp, deñiz askerlerini Moskvağa alıp ketmege mecbur etti.
Bu aqta Ukraina prezidenti Petro Poroşenko dekabrniñ 5-nde Facebook saifesinde yazdı.
«Qırımlı ukrainler ve qırımtatarlar birinci üç kün içinde cenk esiri olğan deñizcilerimiz içün 100000 ğrıvnâdan çoq, em de aş ve urba topladılar. Siziñ birligiñiz istilâcılarnı qorqutıp, qaramanlarımıznı Moskvağa avuştırmağa mecbur etti», – dep qayd etti prezident.
O, Ukraina, deñizcilerniñ qorantalarını qayğırıp, askerlerniñ tez vaqıtta azat etilmesi içün elinden kelgenini yapmağa devam etecek, dep işandırdı.
«Özüñkilerini qaldırmağan birlik millet bütün duşmanlarnı yeñeceginden şübe barmı?», – dep qoştı Poroşenko.
Tünevin Ukraina prezidenti Petro Poroşenko Keriç Boğazında Rusiye tarafından zapt etilgen Ukraina askerleriniñ qorantalarınen körüşti.
Aqmescit ve Keriç mahkemeleri Keriç hastahanesinde bulunğan 3 yaralanğan askernen beraber 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
