İşğal etilgen Qırımda Ukraina vatandaşlarınıñ imayesini yarımada sakinleriniñ problemlerini al etmek içün şekillendirilgen qanun teşebbüsleri paketi temin etecek. Bu aqta Ukraina prezidentiniñ Qırım Muhtar Cumhuriyetindeki daimiy vekili Anton Korınevıç Ukrinformğa bildirdi.
«Bunıñ üzerinde çalışamız, ükümetten tış cemaat teşkilâtlarınıñ pek yahşı teşebbüsler paketimiz bar… Müim şeyleri bar olğanını tüşünemiz, hususan rezident olmağan qırımlılarnıñ meseleleri ve vesiqa aluvınıñ qolaylaştırıluvı», – dedi Korınevıç.
Onıñ qayd etkenine köre, bu qanun teşebbüsleriniñ faal lobbi şekillendirilüvi yañı parlament işinen başlatılacaq.
Ukraina prezidentiniñ Ofisi de muntazam sürette baqılacaq areketler planı ile işğal etilgen topraqlar reintegratsiyasınıñ strategiyasını azırlamağa planlaştıra.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
