Qırımda iyülniñ 7-nde Rusiye quvetçileri bir qaç evde tintüv keçirdi. İnsanlarnı Aqmescitteki FSB idaresine alıp keteler. Bu aqta «Qırım birdemligi» birleşmesi bildire.
Qurman rayonındaki Büyük Onlar qasabasında faal Emil Ziyadinovnıñ evinde tintüv keçirildi. Ziyadinovnıñ ömür arqadaşı bildirgenine köre, tintüv vaqtında eki bilgisayar, edebiyat, sistema bloku tutıp alındı.
«205.5 maddesiniñ birinci qısmı (Terror teşkilâtınıñ faaliyetini teşkil etüv ve bu teşkilâtnıñ faaliyetinde iştirak etüv – QA). Aqayımnen meni odağa alğanlar, (quvetçiler – QA) işbirligi yapmağa razı olsaq ve bu firqanıñ (tahmin etilgeni kibi Hizb ut-Tahrir – QA) azaları olğanını qabul etsek, ceza daa az olur, ev apsi bile ola bile, dep aytqanlar. Aqayım bir şey imzalamadı», – dep ayttı qadın.
Faallerniñ bildirgenine köre, tintüvden soñ altı insan FSBge alıp ketirildi: Seyran Hayretdinov, Aleksandr Sizikov, Emil Ziyadinov, İsmet İbragimov, Alim Sufyanov, Vadim Bektemirov.
İyülniñ 7-nde saba Qırımnıñ bir qaç yerinde Rusiye quvetçileri tintüv keçirip başladı. Tintüv sebepleri belli degil, Qırımnıñ Rusiye quvet müessiseleri vaziyetni izaatlamay. Qırım.Aqiqat tafsilâtlı malümat almağa tırışa.
Advokat İslâm Velilâyev, onı FSB hadimleri tintüv keçirgen evge kirsetmedi, dep ayttı.
2014 senesiniñ Rusiyeniñ Qırım işğalinden soñ mustaqil jurnalist, vatandaş faali, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
