Qarasuvbazarda Akim Kurtdedeniñ evinde martnıñ 22-nde tintüvler keçirildi. Bütün aileni belli olmağan tarafqa alıp ketkenler, dep bildire «Qırım birdemligi» cemaat birleşmesi Facebook saifesinde.
Qayd etilgenine köre, evde qorantanıñ üç azası bar edi: ana-babaları Seviye Kurtdede ve Tair Kurtdede ve Akimniñ küçük qız qardaşı Alime. Akim Kurtdede ise Avropada çalışa.
«Tair Kurtdede tintüv qararı kösterildi, dep bildirdi, amma Rusiye uquq qoruyıcıları ne qıdırğan ve ne sebepten kelgen bilmey. Kurtdede qorantasını iş maşinasınen Qarasuvbazar iç işler nazirligi rayon bölügine alıp ketkenler», – dep aytıla haberde.
«Qırım birdemliginiñ» bildirgenine köre, Qarasuvbazarda iç işler nazirligi rayon bölügi ögünde toplaşqan insanlarğa idare yolbaşçısı çıqıp, Kurtdede qorantasınıñ azaları Ekstremizm ile küreş merkezine ve Rusiye FSBsiniñ yerli idaresine ketirilmegen edi, dep ayttı. Onıñ bildirgenine köre, olar Aqmescitteki Rusiye FSBsiniñ merkeziy idaresinde buluna bile.
Al-azırda bu malümat Qırımdaki Rusiye uquq qoruyıcılarınıñ saytlarında yoq.
Qırım.Aqiqat tafsilâtlı malümat almağa tırışa.
Fevralniñ 14-nde Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emirüseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti. Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
