Rusiye uquq qoruyıcıları Qarasuvbazarda tintüvden soñ qırımlı Akim Kurtdedeniñ qoranta azaları evge yiberildi, dep bildire «Qırım birdemligi» cemaat birleşmesi.
«Belli oldı ki, Kurtdede qorantası yiberildi ve olar evlerine qayta. Faaller olarğa yol aldı», – dep aytıla Facebooktaki haberde.
Daa evel haber etilgeni kibi, Qarasuvbazarda keçirilgen tintüvden soñ Akimniñ ana-babası Seviye Kurtdede ve Tair Kurtdede, Akimniñ qız qardaşı Alime tutuldı. Akim Kurtdede ise Avropada çalışa.
Tair Kurtdede tintüv qararı kösterildi, dep bildirdi, amma Rusiye uquq qoruyıcıları ne qıdırğan ve ne sebepten kelgen bilmey. Kurtdede qorantasını iş maşinasınen Qarasuvbazar iç işler nazirligi rayon bölügine alıp ketken ediler.
«Qırım birdemliginiñ» bildirgenine köre, Qarasuvbazarda iç işler nazirligi rayon bölügi ögünde toplaşqan insanlarğa idare yolbaşçısı çıqıp, Kurtdede qorantasınıñ azaları Ekstremizm ile küreş merkezine ve Rusiye FSBsiniñ yerli idaresine ketirilmegen edi, dep ayttı. Onıñ bildirgenine köre, olar Aqmescitteki Rusiye FSBsiniñ merkeziy idaresinde buluna bile.
Al-azırda bu malümat Qırımdaki Rusiye uquq qoruyıcılarınıñ saytlarında yoq. Qırım.Aqiqat tafsilâtlı malümat almağa tırışa.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
