Oktâbrniñ 17-nde saba tintüvden soñ tutulğan Bağçasaray rayonınıñ sakini Nariman Ablâyev qabaatı aydınlatılmayıp, Qırımdaki Rusiye İç işler nazirligi idaresinden yiberildi, dep bildire Qırım.Aqiqat mühbiri.
Ablâyevniñ aytqanına köre, İç işler nazirliginiñ hadimleri evini tintkende bir şey almadılar, daa soñra Aqmescitteki Ekstremizm ile küreş merkezi binasında sorğuğa çektiler. Tintüv sebepleri aytılmadı. Ablâyev sorğu aqqında tafsilâtlı bir şey aytmay.
Oktâbrniñ 17-nde saba Qırımnıñ Bağçasaray rayonındaki Belokamenka köyünde yerli sakin Nariman Ablâyevniñ evinde tintüv keçirilgeni belli oldı. Er adam belli olmağan yerge alıp ketirildi.
Sentâbrniñ 27-nde Rusiye quvetçileri Sudaqta qırımtatar faali, Sudaq regional meclisiniñ reisi İlver Ametovnıñ evini tintken edi.
Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy dava başlattı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
