Martnıñ 22-nde Qarasuvbazarda Rusiye uquq qoruyıcıları tarafından evi tintilgen qırımlı Akim Kurtdede «Noman Çelebicihan qanunsız göñülli batalyonında» iştirak etkeninden şübheli sayıla.
Qırımlı advokat Edem Semedlâyevniñ Qırım.Aqiqatqa bildirgenine köre, tintüv vaqtında yasaqlanğan bir şey tapılmadı.
Tintüv Kreml kontrolindeki Aqmescitniñ Kiyev rayon mahkemesiniñ qararı esasında keçirildi. Tahqiqat areketlerinden soñ Akim Kurtdedeniñ qoranta azaları Qarasuvbazardaki Rusiye FSBsiniñ bölügine alıp ketirildi, anda olarnı sorğuğa çekkenler. Daa soñra ise evge yibergenler.
Daa evel qayd etilgeni kibi, Qarasuvbazardaki tintüv vaqtında Akimniñ ana-babası Seviye Kurtdede ve Tair Kurtdede, Akimniñ qız qardaşı Alime tutuldı. Akim Kurtdede ise Avropada çalışa.
Qırımdaki Rusiye uquq qoruyıcılarınıñ saytlarında tintüvler aqqında malümat yoq.
2018 senesi noyabr ayında advokat İslâm Velilâyev Qırımda «qanunsız göñülli birleşmelerde» iştirak etkeninden sebep cinaiy taqipler arta bile, dep bildire.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Qırımtatar Milliy Meclisi, bu meselenen bağlı bütün malümat Ukraina prezidenti Petro Poroşenko ve İç işler naziri Arsen Avakovğa berildi, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
