Qırımnıñ Qarasuvbazar rayonındaki Taygan suv anbarı pek saylaştı. Suv seviyesiniñ tüşmesi sebebinden suv anbarı ekige bölündi demek mümkün. Bunı Qırım.Aqiqat mühbiri haber ete.
Noyabrniñ 23-nde Sputnik Rusiye devlet radiosınıñ yaynında Qırımnıñ işğal yolbaşçısı Sergey Aksönov, Qırımda "bütün suv anbarları ve havuzlar toludır, suv teminatı ile bağlı telükeler yoq", dep bildirdirgen edi.
Rusiyeniñ içtimaiy palatasında iş tecribesi olğan qırımlı mimar, faal Olga Veçerniñ fikrince, Aksönovnıñ bu bildirmesi oña daima doğru malümat berilmegenini köstere.
"Taygan suv anbarı Qırım içün strategik emiyeti olğan yerlerden biridir. Eki yıl evelsi onıñ suvunen Aqmescitniñ suvsızlıqtan qurtarılğanını unutmadıq, şunıñ içün de Qırımnıñ yolbaşçısı onıñ vaziyeti aqqında aktual malümatnı bilmelidir", - dedi o.
2020 senesi avgustnıñ 10-nda Qırımda Rusiye Mudafaa nazirliginiñ reberligi ve yerli Rusiye akimiyet organları Qarasuvbazar rayonındaki Taygan suv anbarından Aqmescitniñ ihtiyacalarına suv naqil etmek içün rus arbiyleri tarafından qurulğan suv kemerini çalışırıp başladı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
