Qırımda suv basuvlarından soñ vaqtınca yerleşüv noqtalarında 170 adam qala. Bunı Rusiye FVN matbuat hızmetine atfı etip TASS agentligi haber ete.
«Rusiye FVN Krasnodarda ve Qırım Cumhuriyetinde yüz bergen suv basuvlarınıñ aqibetleri yoq ete. Pompalap suv çekile, meydan temizlene, evler qurutıla. Suv basuvlarından soñ vaqtınca yerleşüv noqtalarında 170 adam qala», – dep yazıla bildirmede.
Qırımda toqtamağan sağanaqlar sebebinden iyülniñ 4 ve 5-nde Bağçasaray rayonındaki bir sıra mesken yer suv altında qaldı. Küçlü yağanaqlar Bağçasaray rayonında tahminen 100 evni suv basmasına sebep oldı. Suv basuvından zarar körgen esas köyler – Albat, Kokköz, Foti Sala, Aromat. Şiddetli yağanaqlar sebebinden Belbek, Kokköz ve Baga özenleri taştı.
Bağçasaray rayonında suv basqan yerlerden 160 insan tahliye etildi, olarnıñ arasında 31 bala.
Qırım Gidrometeorologik merekeziniñ malümatına köre, Belbek özeninde suv seviyesi 2 metr 40 santimetr artqan.
Bağçasaray rayonında fevqulâde vaziyet ilân etildi.
