Qırımda maşinaları suv basuvından zarar körgen vatandaşlardan tazminatnen bağlı arizalar qabul etilip başladı. Bu aqta Qırımnıñ Rusiye yolbaşçısı Sergey Aksenov Facebook saifesinde haber etti.
Aksenovnıñ bildirgenine köre, tazminat miqdarı «tamir-ğayrıdan tiklev işleri keçirilmesiniñ iqtisadiy maqsadqa uyğunlıq ve maşinanıñ bazar fiyatına» köre esaplanacaq, maşinanıñ bir qaç saibi olsa, bir kerelik ivaz tek birisine berilecek.
«Maşinanıñ bazar fiyatı 300 biñ rubleden çoq olmasa, hayriye yardım zararnıñ 100%-ı miqdarında olacaq. Fiyatı 300 biñden çoq olsa, tazminat zararnıñ 40%-ı olacaq», – dep aytıla haberde.
Aksenovnıñ bildirgenine köre, tazminat almaq içün arizanen beraber aşağıdaki vesiqalar berilmeli:
- Şahsiyet vesiqasınıñ kopiyası;
- Arizanı maşina saibi bermese, maşinağa saiplik aqqını isbatlağan vesiqa kopiyası;
- Maşina pasportınıñ kopiyası;
- Maşinanı qayd etüv şeadetnamesiniñ kopiyası;
- Maşinanıñ KASKO sigortasınıñ kopiyası (bar ise).
Arizalar 2021 senesi avgustnıñ 10-na qadar qabul etilecek.
«Arizalar qabul etilgen adresler: Aqmescit, Sevastopolskaya soq., 20A; Yalta, Marşak soq., 6, üçünci qat, 5-inci oda; Keriç, Kirov soq., 15. 2021 senesi avgustnıñ 10-ndan soñ kelgen arizalar baqılmaycaq», – dep aytıla haberde.
Yağanaqlar sebebinden Qırımda iyülniñ 4-nde Bağçasaray rayonındaki bir sıra meskün yerni suv bastı. Akimiyet suv taşqını sebebinden fevqulâde vaziyet rejimini ilân etti.
Qırımnıñ Rusiye Fevqulâde vaziyetler nazirliginiñ idaresi 2021 senesi iyünniñ 16-ndan 18-ne qadar küçlü yağanaqlar sebebinden Yaltada ve şarqiy Qırımda 426 azbarnı, 356 evni, 18 içtimaiy ceetten müim obyektni suv bastı, dep bildirgen edi. Umumen suv basqan yerlerden 1783 kişi tahliye etildi.
Kreml kontrolindeki Qırım iqtisadiy inkişaf naziri Dmitriy Şerâkonıñ malümatına köre, Qırım iş adamları yarımadada iyün ayında olğan suv basuvından tahminen 650 millionlıq zarar kördi.
Rusiye ükümetiniñ reis muavini Marat Husnullin iyün ayında Qırımda olğan suv basuvı 10 milliarl rublelik zarar ketirdi, dep bildirdi.
