İşğal etilgen Qırımda faaller ukrayin şairi Taras Şevçenkonıñ 210 yıllığına onıñ şiirlerinden satırlarnı tarqattılar. Bu aqta "Sarı şerit" areketi telegram kanalında bildirdi.
"Sarı şerit" areketiniñ faalleri Aqmescitteki Şevçenko parkı ve Vernadskiy adına universitet yanında Kobzarnıñ şiirlerinden satırlar tarqatalar'', - dep aytıla haberde.
Martnıñ 9-nda Taras Şevçenkonıñ doğğanına 210 yıl tola.
"Sarı şerit" teşkilâtı - Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areket teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa kiçik şeerlerniñ sakinleri qoşula.
Areketniñ eñ belli aktsiyalarından biri - sarı şeritlerniñ asılması ve yarımadada "Qırım Ukrayinadır" yazısı ile plakatlarnıñ yapıştırılmasıdır. Yaqında faaller Boyko dağında Ukrayina bayrağını köterdiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
