Qırımtatar Milliy Qurultayınıñ delegatı Asan Egizniñ kimligi belli olmağan insanlar tarafından qaçırılması Qırımdaki Rusiye Taqiqat komitetiniñ arbiy taqiqat bölügi tarafından teşkerilmekte. Bunı advokat Ayder Azamatov bildirdi, dep haber ete Qırım.Aqiqat mühbiri.
Azamatovnıñ aytqanına köre, Qırımnıñ Aqmescit rayonındaki Taqiqat komiteti Asan Egizniñ uquq qoruyıcı organlarınıñ hadimleri urbasınla kimligi belli olmağan insanlar tarafından qaçırılmasına dair bergen arizası boyunca eki ay devamında taqiqattan evel teşkerüv keçirip, onıñ malümatlarını arbiy taqiqat bölügine yolladı.
«İşbu qarar taqiqatnıñ bu işte uquq qoruyıcı qurulışlarınıñ iştirak etkenini körgenini ifadeley», – dedi Azamatov «Qırım birdemliginiñ» körüşüvinde.
Advokat, teşkerüv neticesinde cinaiy iş açılıp açılmağanına dair malümatnı bermek talabı ile Egizniñ adından muracaat etti.
Mayısnıñ 23-nde Aqmescit rayonındaki Colman (Pionerskoye) köyü yanında belli olmağan uniformalı şahıslar Qırımtatar Milliy Qurultayı delegatı Asan Egizni tutqan ediler. Rusiye FSBsiniñ Qırımdaki idaresi Egizni yaqalağanlarını inkâr ete edi. Daa soñra alıp qaçılğan Egiz kötek izleri ile ormanda tapıldı.
Ukraina Tış işleri nazirligi ilhaq etilgen Qırımnıñ Aqmescit rayonında Asan Egizniñ alıp qaçırılmasını takbih etti.
Rusiyeniñ Qırım Tahqiqat komiteti, Qırımtatar Milliy Qurultayı delegatı Asan Egizniñ imayesiniñ ricası ile, onıñ alıp qaçılğan yerinde mayısnıñ 23-nde GİBDD (Yol areketiniñ telükesizligi devlet inspektsiyası) hadimleriniñ olıp olmağanını tayin etken edi.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler keçire.
