Link açıqlığı

Saatnıñ esas haberi

Qırımdaki Rusiye quvetçileri apiske alınğan Marlen Asanovnıñ qorantasına tenbi vesiqasını ketirdi


Bağçasaraydaki ekinci «Hizb ut-Tahrir davasınıñ» mabüsi Marlen (Suleyman) Asanov

Cumaaqşamı künü, aprelniñ 9-nda, Rusiye quvetçileri 2017 senesi apiske alınğan Bağçasaraydaki ekinci «Hizb ut-Tahrir davasınıñ» mabüsi Marlen (Suleyman) Asanovnıñ evine kelip, «onı qanunsız aktsiyalarda iştirak etmeycek», dep tenbilemege istedi.

Bu aqta apayı Ayşe Asanovanıñ malümatına esaslanıp, «Qırım birdemligi» cemaat teşkilâtı Facebookta bildirdi.

«Onıñ (politsiya vekiliniñ – QA) aytqanına köre, aqayım «bir yerde köründi ve onıñnen 2020 senesi mayısnıñ 1-nden 5-ne qadar qanunsız aktsiyalarda iştirak etmeycegine dair profilaktika subeti keçirilmeli». Evde yoq dedim. Politsiya hadimi aqayımnen bağlanıp laf etmek içün kontakt malümatlarını istedi. Tebessümni zornen tutıp, laf etecek olsa, Rostov-na-Donu SİZOsına barsın, dep cevap berdim», – dep tarif etti Asanova.

Qadın, aman-aman üç yıldan berli apiste bulunğan aqayınıñ alâ daa bir cedvellerde qayd etilgenine şaştı.

«Onı apiske almaq içün politsiya, FSB, Rusiye gvardiyasınıñ hadimleri kelgen edi. Cinaiy qıdıruvda ise bu malümat yoq, demek. Bir şey imzalamadım, ebet», – dedi Ayşe Asanova.

2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.

«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.

2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG